Okwi apewa masharti magumu Simba

STRAIKA aliyesaini mkataba wa miezi sita na Simba, Emmanuel Okwi, amepewa masharti magumu ambayo asipoyatekeleza yatamgharimu. Viongozi wa Kamati ya Usajili ya Simba wameamua kumshupalia mchezaji huyo kutokana na rekodi zake za usumbufu wa mara kwa mara ikiwamo kwenda kwao na kuchelewa kurudi kambini. Akizungumza na Mwanaspoti Mwenyekiti wa kamati hiyo, Zacharia Hans Poppe, amesema wanaelewa tabia za Okwi na wamekaa naye na kumpa masharti kwamba anatakiwa kubadilika kwa vile nafasi waliyompa ndiyo ya mwisho vinginevyo hawataweza kumvumilia. Bosi huyo aliyemtambulisha Okwi mwishoni mwa wiki iliyopita, alisema wamemsisitiza Okwi kujituma na kuimarisha kiwango chake kwa muda huu ili arudi kwenye fomu aliyokuwa nayo siku za nyuma kwani Simba ni timu kubwa na haitetemekei umaarufu wa mchezaji. Alisema Simba waliyoisajili sasa inaweza kufanya makubwa bila kumtegemea Okwi na ndiyo maana wamempa mkataba ambao utamruhusu kuondoka kama akipata timu popote. “Tunatambua hilo la tabia yake, kila kitu kipo wazi tumemweleza kwamba tunamkaribisha katika timu yetu, lakini anatakiwa kuangalia maisha yake yalivyokuwa kila timu aliyokwenda na sasa hii nafasi tuliyompa ni kama nafasi ya mwisho kwake kutakiwa kujirekebisha,” alisema Hans Poppe. “Hatukuwa tunamuhitaji sana Okwi katika timu yetu lakini kwa kuwa alikuja kutuomba tukalazimika kumkubalia, sasa tumemweleza kwamba hatuna mchezaji anayejiona ni muhimu zaidi kuliko wengine. Simba ya sasa kila mchezaji ni muhimu. “Hata yeye mwenyewe ameliona hilo juzi katika mechi yetu na amekiri kwamba akizembea anaweza kuishia benchi kutokana na uwezo wa wachezaji wetu wa sasa. “Amejionea mwenyewe kwamba tunaweza kufanya makubwa bila yeye, sasa hilo lipo mikononi mwake.” Simba juzi Jumamosi usiku iliwachapa KMKM ya Zanzibar mabao 5-0 katika mchezo wa kirafiki. Mafowadi wa Simba wamewapiku wa Yanga kwenye ufungaji wa magoli kwenye michezo ya kirafiki visiwani Zanzibar baada ya timu zote kucheza michezo mitatu mitatu huku Simba ikishinda kwa mzabao wakati Yanga ikiambulia matano. Kwa upande wa Simba, mchezo wa kwanza ulikuwa ni dhidi ya Kilimani City ambapo Simba ilishinda mabao 2-1, wafungaji walikuwa Shabani Kisiga pamoja na Haroun Chanongo.